Më datë 19 tetor 2011, në Romë, Itali, u zhvillua takimi mes delegacionit të AKCE, kryesuar nga Drejtori z. Sadi Hoti dhe përfaqësues të DigitPA (Centro Nazionale per l'informatica nella Pubblica Amministrazione).

Vizita u bë e mundur me ndërmjetësimin e Postecom SA. Kjo vizitë vjen si vazhdim i disa të tjerave që AKCE ka ndërmarrë në institucionet homologe në vendet e Bashkimit Europian me qëllim shkëmbimin e informacionit dhe për të mbledhur eksperiencat e dobishme për zhvillimin e aktivitetit tonë, siç janë BNETZA (Federal Network Agency) në Gjermani dhe ANSSI (Network and Information Security Agency) në Francë.

Pas përshëndetjes dhe një përmbledhjeje të shkurtër te aktivitetit të kësaj agjensie, bërë nga Presidenti i DigitPA, z. Francesco Beltrame, z. Eris Asllani, Shef i Sektorit të Pranimit, ka prezantuar shkurtimisht situatën mbi nënshkrimet dhe komunikimet elektronike në Shqiperi me referencë të veçantë menaxhimin e Nënshkrimeve Elektronike. Më pas z. Tatti, z. Arbia dhe znj. Lodi kanë prezantuar aktivitetet e DigitPa, procedurat e regjistrimit dhe mbikëqyrjes të Ofruesve të Shërbimit të Certifikimit si dhe dixhitalizimin e administratës publike.

Në përfundim të takimit, Drejtori i AKCE, z. Hoti ka theksuar nevojën për të ruajtur kontaktet me DigitPa, shkëmbimin e mëtejshëm të përvojës nëpërmjet bashkëpunimeve të mundshme dypalëshe dhe rolin e dy agjensive si një urë lidhjeje mes dy ministrive përkatëse për hartimin e një memorandumi bashkëpunimi.

Këtu do të gjeni të gjitha prezantimet e aktivitetit (formati pdf).

Nënshkrimi elektronik në Shqipëri